Grosse Fussstapfen – Danke Präsi  

2014 hat der damalige Vereinspräsident Hansi Meyer sein Amt dem jungen Stefan Lerch übergeben. Bereits nach kurzer Zeit wurde er nur noch mit «Präsi» angesprochen.

Heute, 10 Jahre später blicken wir auf grosse, wirklich grosse Fusstapfen, die Stefan Lerch hinterlassen hat, zurück. Seine herzliche, organisierte, motivierende und auch klare Persönlichkeit ziechneten ihn aus. Er hat den Verein nicht nur zusammengehalten, er hat uns Turnerinnen und Turner durch Krisen geführt und für den Erhalt, und sogar für die Vergrösserung des Vereins gesorgt. Er war immer da und hatte für alle Angelegenheiten ein offenes Ohr. Was ihn aber besonders auszeichnet ist sein Gespür für Menschen. Denn er fand den Draht zu Gross und Klein und wurde von allen gleichermassen geschätzt. Zwei Jahre hat er nach einem geeigneten Nachfolger gesucht. Als erste Frau in unserer Vereinsgeschichte fand er die perfekte Nachfolge mit Rebecca Heiniger.

An der HV am 1. März 2024 war es so weit: Der «Präsi» gab sein Amt ab und wir haben uns etwas ganz Besonderes für ihn ausgedacht. Um aufzuzeigen, wie gross die Wertschätzung ihm gegenüber ist, haben sich alle Riegen an der Laudatio beteiligt und aus ihrer Perspektive die schönen Erinnerungen, die sie mit ihm hatten, geteilt:

Aus der Damenriege
Stöffu, du bisch e Presidänt nid ume ufem Papir, du steisch Zischti und Friti ir haue und läbsch dr Turnbetrib.
Was di usmacht isch di starch Wettkampfgeischt. Wie mängisch hei mir nang höch gno, wär as äch am Turnfescht ufem Podescht steit. Und dr Gwünner hets am anger natürlech no lang schadefröidig unger d Nase gribe….

Aus der Herrenriege
Jo, dr Steffu isch praktisch immer i dr Haue und läbt dr Turnverein vor. Är isch eine, wo mit beidne Beii am Bode stoht. Usser bim Smash im Volleyball. Dört stigt är, dass es uf dr angere Site dunku wird. Nume dr Bau landet säute dört wo ner sött…
I ha mir lang überleit, was me übere zuekünftig Ex-Präsident cha säge. Aber är bietet praktisch ke Agriffsflächi, wo me ne chönnt kritisiere oder höch näh. I dr Herrerige gits niemer wo nid uschunnt mit ihm. Sini ruehigi und überleiti Art wird vo aune sehr gschätzt.

Aus der Frauenriege
Das het sech ou im bunt zämegwürflete Turnerobe-OK zeigt. Sis Gschick – Jung und Alt z vereine – het sehr derzue bitreit, dass es Spass macht, im Turnerobe-OK mit z schaffe. Är het üs vor Programm-Gruppe immer sehr unterstützt, üs aber o s Vertroue gäh und üs lo mache. Dr Steffu het i de letschte Johr dr Turnerobe massgäblech mitprägt und als OK-Chef d Fäde zämeghaute.

Aus dem Vorstand
Dr Steffu wird aber nid nume ir Haue oder im Turnerobe-OK sehr gschätzt – ou im Vorstand isch es sehr agnähm gsi, mit ihm zäme z schaffe.
Är het stets dr Überblick gha und dür sini pragmatischi Art, si immer Lösige im Fokus gstande. Das het sech idrücklech ou während de Corona-Monet zeigt, wo när i sire Amtszyt e zimlechi Heruseforderig het müesse meischtere.

Dr Steffu het einsich gseit: «Äs isch für mi sehr wärtvoll, Teil vor Turnerfamilie z sii. Eifach mou id Turnhaue goh, sech sportlech betätige, dr Kopf lüfte und aschliessend gmeinsam über Wichtigs oder no besser Unwichtiges bimene Bier diskutiere.» I globue das zeigt ganz guet sini Art. Wärtschetzte was me am Turnverein het und ou öppis derfür due, aber glichzytig e gwüsse Lockerheit a Tag lege und nid aues so verbisse näh.

Abschluss-Gedicht 😉

Liebe Steffu
Es hätte ou no es paar Jöhrli meh dörfe si.
Usem nüt bisch du vor 10 Johr Presi worde,
du hesch das super gmacht und verdiensch derfür e Orde.
D Sitzige und au d HVs hesch du zackig düregrühert,
und derbi keni Ufgabe verrühert.
Öb bim Turne, Turnfahrt oder amene Turnfescht,
dr Presi isch immer unger de Gäscht.
Mir hoffe, du blibsch am TV no lang so aktiv erhalte,
wöu mir wei di no für angeri Ämtli phaute.
Merci Steffu für au diä gleischtete Sache,
ab jetzt bisch du dr EX-Presi, muesch gar nid lache!

Liebe «Präsi», im Name vom ganze Turnverein danke mir dir ganz härzlech für dini gleischteti Arbeit.