Der chli angersch Rückblick auf die letschte 12 Froueriege-Monet

  • 8. Januar 2015

Im Januar im Januar isch Skiweend, das isch doch klar
Bi vüu Sport und no meh Spass, het me die schöni Winterlandschaft vo Adelbode gnosse.

Im Februar im Februar si d Glänk und d Muskle vo de Turnerinne gar nid starr.

Im März im März luegt d Froueriege ufene stränge Früehlig vorwärts.

Im April im April stöh mir nume säute still
Näbscht em „normale“ Turnbetrieb steit ou no d Grüendonnschtigwanderig ufem Programm. Die isch ou hür wider luschtig und abwächsligsrich gsi. Mir si jo scho auti (Oschter) Hase im
Eierdütsche. Ändi April isch de schaffe agseit. Üsi feine Waffle nach Grossmuetterart finde ar Tomwood-Usstellig scho bau „riessende“ Absatz.

Im Mai im Mai mache mr allerlei
Gwärbusstellig Niederbipp isch für aui Froue wo ghulfe hei e riese Chrampf gsi.
Danke aune füre Isatz, wonis e schöne Batze id Vereinskasse brocht het.
Dr Maibummel hets Thema „typisch schwizerisch“ gha. Es het e Parcours gäh mit Froge zur Schwiz, mir hei es feins Fondue mit de Langgable usem Chessi gässe
und sogar no d Nationalhymne gesunge!
Last but not least hei sech de ou no es paari i Bärg gwagt und si uf die traditionelli Uffahrtswanderig.

Im Juni im Juni nei nei do verchoufe mr ke Muni
Derfür ässe mir, die wiedereinisch meh super fein kochete Spaghetti, ir Reckenacherhütte.

Im Juli im Juli do si mr de chli fuli
Mir löh nis lo verwöhne und gniesse die kulinarische Leckerei wo üs im Summerprogramm grosszügig spändiert wärde. Ganz härzleche Dank!!!
E Reis i d Wäut vo de Biber isch de ou ufem Programm gstande und mir chöi jo so ruhig und liisli si, dass mr sogar eine gseh hei!!

Im Ouguscht im Ouguscht do isch dr Summer e einzige Fruscht
Summer cha me däm jo eigentlech nid säge. Aber wie seit me so schön: „wenn Engel reisen“. Dr Samschtig het no chli durzoge agfange. Wo si de im Himmu obe aber gmerkt hei wär do uf dr Turnerreis isch, chunnt d Sunne!!!

Im September im September do dänkt me scho a November
Vor auem üsi Leiterinne zerbräche sech dr Chopf. Was chönnt me ächt am Turnerobe mache? Mit zwifle nid, dass do öppis guets usechunnt.

Im Oktober im Oktober do ischs Heu im Schober (isch mr nüt bessers i Sinn cho)
Im Oktober si vüu vo üsne Froue chli „Reisefüdli“. Ob Meer oder Bärge, z Fuess, mit Flugi oder Sägelboot, Ferie si agseit!! Us däm Grund hets nie vüu Aktivi ume. Umso fitter und erholter geits de när id Probe für d Obeungerhautig.

Im November, im November isch eis Wuchenändi rot agstriche im Kaländer
Ob aktiv uf dr Bühni oder aktiv am häufe, dr Ungerhautigsobe vom Turnverein isch eis vo de Highlights im Johr. Hür si mr im Reige uf Mexiko entfüehrt worde. D Froue hei zeigt, das me ou no im „fortgschrittnere“ Auter cha Bei zeige!! Bravo super gmacht. Wie dr uf de Föteli chöit gseh, fählts ou nid a dr Sterkig vor-, zwüsche- und nachem Uftritt……. Nachere churze Pouse, chunnt scho dr Wiehnachtsmärit. Ou das Johr finde üsi Waffle grosse Aklang. Trotz Bise chöme d Lüt zahlrich, so dass am Schluss quasi ke Teig me für blibt.

Im Dezember, im Dezember dänkt me zrugg a Novämber
Säubstverständlech nid nume a Novämber. Ar Riegeversammlig luege mir gäng chli ufs ganze Johr zrugg.
Hür si mr z Attiswil im Bäre gsi. Nachem offizielle Teil hets es feins Aesse gäh. Uesi 3 Sylvias hei e luschtige Reisebricht vortreit. Aschliessend hei mr e Iblick übercho vom Ferie mache im Auter. Es passends Ziel zfinge isch auso nid eifach. Im aschliessende Lottospiel hei nid aui glich vüu Glück gha (gäu Susi) und einigi hei sogar gfunge, es sigi es „Schissspili“.
Egal, es isch e churzwilige und schöne Obe gsi.
Dr letscht Programmpunk vo däm Johr isch de no d Winterwanderig am 30.12.14 wo mr ufeme Rundgang die schön dekorierte und belüchtete Wiehnachtsfänschter göh go luege.

2015 wird für d Froueriege es bsungers Johr. S 60 jährige Jubiläum mit dr 3 tägige Reis stoht ufem Programm.